Russia and USA
រុស្ស៊ីនិងស៊ីរីបន្តវាយប្រហារអាឡិបប៉ូ ថ្វីបើសន្យាការស្តារបទឈប់បាញ់ជាថ្មី
ក្រុងបេរូតៈ យន្តហោះចម្បាំង ស៊ីរី និងរុស្ស៊ី បានធ្វើការវាយប្រហារថ្មីៗលើខណ្ឌជាច្រើននៃក្រុងអាឡិបប៉ូ ដែលគ្រប់គ្រងដោយក្រុមឧទ្ទាម កាលពីព្រលឹមថ្ងៃព្រហស្បតិ៍ មួយថ្ងៃបន្ទាប់ពីក្រុមមហាអំណាចពិភពលោក បានសន្យាព្យាយាមជាថ្មីម្តងទៀតដើម្បីចរចាបទឈប់បាញ់ជាប់លាប់មួយសម្រាប់ស៊ីរី ដែលបំផ្លិចបំផ្លាញដោយសង្គ្រាម ដោយធ្វើការពិភាក្សាពហុភាគី នៅចុងសប្តាហ៍នេះនៅអឺរ៉ុប។
ការវាយឆ្មក់នេះ កើតមានឡើង ក្រោយពីការទម្លាក់គ្រាប់បែកដ៏ខ្លាំងក្លាពីរថ្ងៃមុនដែលសម្លាប់ជនស៊ីវិលយ៉ាងតិច ៧១ នាក់។ ក្រុមឃ្លាំមើលសិទ្ធិមនុស្សស៊ីរី បាននិយាយថា ការទម្លាក់គ្រាប់បែកជាង ២០ លើក បានវាយប្រហារភាគខាងកើតនៃក្រុងអាឡិបប៉ូ ពីព្រលឹមថ្ងៃព្រហស្បតិ៍ ប៉ុន្តែពុំទាន់មានរបាយការណ៍នៃការស្លាប់ និងរបួសនៅឡើយ។ ទូរទស្សន៍រដ្ឋបាននិយាយថា កុមារ ៤នាក់ ត្រូវបានសម្លាប់ដោយ ការបាញ់រ៉ុក្កែតរបស់ឧទ្ទាមដែលចំ សាលារៀនមួយក្នុងខណ្ឌដែលរដ្ឋាភិបាលគ្រប់គ្រងពីព្រលឹមថ្ងៃ ព្រហស្បតិ៍។
ការទម្លាក់គ្រាប់បែកនោះត្រូវបានអមដោយការរុលចូលជាថ្មីរបស់រដ្ឋាភិបាលទៅក្នុងជាយក្រុងភាគឦសាន ដែលកងទ័ពបានកាន់កាប់តំបន់ភ្នំជាច្រើន។ ស៊ីរី ត្រូវបានធ្លាក់ចូលទៅក្នុងហិង្សាអាក្រក់បំផុតខ្លះនៃសង្គ្រាមស៊ីវិល ៥ ឆ្នាំនេះបន្ទាប់ពីបទឈប់បាញ់ មិនប្រកាន់ខ្ជាប់បានដួលរលំខណៈ កម្លាំងរដ្ឋាភិបាលដែលគាំទ្រដោយ កម្លាំងអាកាសរុស្ស៊ី បានជំរុញការវាយប្រហារព្រៃផ្សៃមួយលើភាគខាងកើតអាឡិបប៉ូ ដែលគ្រប់គ្រងដោយឧទ្ទាម។
ក្រុងម៉ូស្គូ និងក្រុងវ៉ាស៊ីនតោន បានសន្យាជាថ្មីម្តងទៀត ធ្វើការពិភាក្សាពហុភាគីនាចុងសប្តាហ៍ នេះនៅទ្វីបអឺរ៉ុប បន្ទាប់ពីការប៉ុនប៉ងចុងក្រោយ បានដួលរលំចំពេលមានការជេរស្តីដ៏ជូរចត់។ ពេលនេះ មានការជំរុញមួយដើម្បី ផ្តល់ឱកាសឲ្យការងារទូតម្តងទៀតដោយប្រកាសពីថ្ងៃពុធ អំពី កិច្ចពិភាក្សាពីរថ្ងៃនៅក្រុងលូសាន នៅថ្ងៃសៅរ៍ និងនៅក្រុងឡុងដ៍នាថ្ងៃអាទិត្យ។
រដ្ឋមន្ត្រីការបរទេសអាមេរិក លោកចន ឃើរី និងសមភាគីរុស្ស៊ីលោក ស៊ើហ្គេយ៍ ឡាវរ៉ូវ ត្រូវបាន គេរំពឹងថា នឹងចូលរួមពីសមភាគី មកពីតួកគី អារ៉ាប៊ីសាអ៊ូឌីត និងកាតា ដែលសុទ្ធតែជាអ្នកគាំទ្រក្រុមប្រឆាំងស៊ីរីនៅក្រុងលូសាន។
នៅក្រុងឡុងដ៍ លោកឃើរី ទំនងជាជួបជាមួយនឹងសមភាគី អឺរ៉ុប ដូចជាអង់គ្លេស បារាំង និងអាល្លឺម៉ង់។ អ.ស.ប. បាននិយាយថា ប្រេសិតប្រចាំស៊ីរី លោក Staffan de Mistura ត្រូវបានអញ្ជើញឲ្យ ចូលរួមក្នុងកិច្ចពិភាក្សានោះប៉ុន្តែ អ្នកនាំពាក្យម្នាក់ បាននិយាយថា លោកមិនដឹងថា លោកនឹងចូលរួមជំនួបពីរក្រុងនោះ ឬយ៉ាងណានោះទេ៕
Comments
Post a Comment